【香港警探反攻全球:讀陳浩基《13.67》】

2018-05-15

香港曾經係全世界一個重要嘅文化輸出地,講起香港嘅電影,好多台灣人、日本人,甚至美國人,都會諗起警匪片:電影《無間道》比日本人視為「香港映畫最高傑作」,仲比荷里活翻拍做《無間道風雲》添;而《Sleeping Dogs》嘅出現,當然都係因為呢一種香港印象。

其實,香港以警察為主題嘅文學創作,同樣犀利;佢亦都同警匪片一樣,將香港文化發揚光大——講緊嘅就係香港本土作家陳浩基嘅《13.67》啦。我地不如一齊睇睇呢本國際知名、華文警察小說嘅最高傑作啦!

《13.67》講咩?

講到《13.67》係華文警察小說最高傑作,絕對無誇張。《13.67》無論係故事性、劇情安排、詭計設計,以及社會價值上面,都配合得非常巧妙,甚至可以話巧妙到令人驚訝嘅地步。

《13.67》成本書以篇幅嚟講係一個長篇故事,但實際上就係6個短篇故事嘅合集。佢嘅每個章節分開嚟獨立睇,都係一個精彩嘅「小故事」;但整體嚟睇,就係一個以倒序方式進行、各章節互為影響嘅「大故事」。而去到最後,你會發現書嘅結尾同開頭有所連結——《13.67》嘅結構,就好似係一個莫比烏斯環(Möbiusband)咁。

《13.67》嘅劇情以兩位香港警察師徒為主線,講述佢地查案、合作,以及成長嘅過程,但同時,更係通過左故事背景嚟側面描寫香港由1967年到2013年之間,長達成個世紀嘅社會變化,例如話67年嘅六七暴動、70年代嘅警廉衝突,以及1997年香港主權移交等等——睇落沉重嘅議題,放係推理小說入面,讀者就可以輕而易舉咁閱讀,可以話係一本香港歷史嘅入門之作。

香港文化反攻國際:《13.67》有幾勁?

更重要既係,《13.67》係近年最國際知名嘅香港推理小說。《13.67》攞左2015年嘅「台北國際書展大獎」,成為左首位得到呢個獎嘅香港作品,仲俾多國嘅書評人讚賞為「擁有香港作家先寫得出既魅力」同「華文警察小說最高傑作」等等。

而《13.67》嘅版權,仲賣左去英國、法國、美國、加拿大、意大利、荷蘭、韓國等等不同國家,所以,假如你上網搜尋陳浩基英文名「Chan Ho-Kei」或者《13.67》嘅英文名《The Borrowed》,可能會搵到更加多改編嘅資料添。

而《13.67》嘅電影改編版權,仲比王家衛買埋,實在令人期待由王家衛拍成嘅《13.67》電影版——當然,王家衛一直以來都買左唔少書嘅電影版權,拍唔拍,開拍之後拍唔拍得成,同埋要拍幾耐,就要睇大師心意啦。

點解香港作家會係台灣成名?

陳浩基係近10年前開始寫作,亦不斷攞獎,佢早就係2011年憑作品《遺忘.刑警》攞到「島田莊司推理小說獎」首獎,仲比擁有「日本推理小說之神」之稱嘅島田莊司本人讚為「具備無可限量才華」添。

陳浩基係台灣打響左名堂,佢既作品亦翻譯左做多國語言,甚至可以話已經全球知名,但反而係香港竟然無乜人識——陳浩基雖然係香港作家,亦生活係香港,但佢嘅所有作品都係台灣出版,非常 #可憐 。

關於呢一點,陳浩基都覺得無可奈何。佢提過,香港社會太追求回報同效益,就連出版業界都講求快速回本同銷售數量,亦唔願意投資係新人作家身上,作家自然更加難係香港生存。佢認為,香港當然有好多推理小說同好多推理作家,但實在好難推廣,亦只得好少人留意,如果香港有後生仔想做推理小說作家,不如試下去台灣,畢竟出版環境好太多,機會自然更多。

本格派+社會派=《13.67》

推理小說經歷咁多年發展,自然有好多流派,例如話本格派、新本格派、變格派、社會派等等,頭三種派別講究嘅,主要都係故事入面嘅詭計;而社會派則著重講述社會議題,推理方面反而係次要。近幾年好多作家都嘗試走社會派路線,例如話日本嘅湊佳苗(《告白》嗰個)啊,就經常以推理小說探討日本社會問題;而東野圭吾(《神探伽利略》/福山雅治嗰個),就由早期嘅本格漸漸走向社會派。

而《13.67》最勁之處,就係佢係微觀之下,每一篇短篇都係本格推理,但宏觀嘅話,整體就係一部反映香港社會現實嘅社會派推理作品。真係好少有作家可以係同一本書入面,同時做到兩種風格,而又不失平衡。

精選段落

「四個月之前,沒有人想到這個城市會有這樣的改變! 因為一樁糾紛,蔓延成暴動,整個城市陷入蠢蠢不安,危機一觸即發。 有人怒吼著抗爭,想要改變現狀,也有人只是默默希望一個穩定的未來,而他徘徊在兩個極端之間,站在界線上。 曾經,他嚮往成為一名警察,只是身處在這個動盪的時代裡,讓他不得不打消念頭。 沒想到,偶然間聽到的一句話,竟把他捲進危險的漩渦,彷彿命中注定要跟警察同進退。 但他更沒想到的是,他和身邊的人都想反抗自己的命運,卻從此走上天差地遠的道路……」

「你要保護的,到底是警察的招牌?還是市民的安全?你效忠的是港英政權,還是香港市民?你,到底為什麼要當警察?」

_______
推理小說之海,真係好大架,大家有無興趣繼續睇其他推理小說嘅介紹文章?本格?變格?社會派?乜都得架。
當然啦,淨係香港本土推理小說都已經有排講啦~有無興趣知多啲嘅話,不如話比我地知啦~

【香港警探反攻全球:讀陳浩基《13.67》】